კანონი 12 ეპისკოპოსებს თავიანთ ცოლებთან თანაცხოვრება არ შეუძლიათ

ესეც ჩვენს ცნობამდე მოვიდა, რომ აფრიკასა და ლიბიაში და სხვა ადგილებში იქაური ღვთისმოყვარე წინამძღვრები, მათზე აღსრულებული ხელდასხმის შემდეგაც, არ ერიდებიან საკუთარ ცოლებთან თანაცხოვრებას, და ამით ერს დაბრკოლებასა და საცდურს უდებენ. ამიტომ, რადგან დიდი მოშურნეობა გვაქვს, ყოველივე ჩვენს ხელქვეშ მყოფ სამწყსოთა სასარგებლოდ აღვასრულოთ, მიჩნეულ იქნა, რომ ამიერიდან ასეთი რამ არამც და არამც არ მოხდეს. ამას კი ვამბობთ არა სამოციქულოდ დაწესებულის გასაუქმებლად ან დასამხობად, არამედ ერთა ცხონებასა და უკეთესისაკენ წარმატებაზე ვზრუნავთ რა, და რათა სამღვდელო მდგომარეობის წინააღმდეგ რაიმე საძრახისი საბაბი არ მივცეთ. რამეთუ საღვთო მოციქული ამბობს: „ყველაფერი ღვთის სადიდებლად აკეთეთ. ნუ აცთუნებთ ნურც იუდეველებს, ნურც ბერძნებს და ნურც ეკლესიას ღვთისას. ისევე, როგორც მე ვცდილობ ყოველნაირად ვაამო ყველას, რადგანაც ჩემთვის კი არა, მრავალთათვის ვეძებ სარგებელს, რათა ყველანი ცხონდნენ. მე მომბაძეთ, როგორც მე ვბაძავ ქრისტეს“. ხოლო თუ ვინმე ამის მოქმედი იქნება მხილებული, განიკვეთოს.